កាលពីរសៀលថ្ងៃទី១៨ ខែមករា ឆ្នាំ២០១៧ នៅមុនពិធីបើកកិច្ចប្រជុំប្រចាំឆ្នាំ២០១៧ លើកទី៤៧ នៃវេទិកាសេដ្ឋកិច្ចពិភពលោក សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា អញ្ជើញជាអធិបតីភាពដ៏ខ្ពង់ខ្ពស់ ក្នុងពិធីបើកវេទិកាវិនិយោគ ដែលរៀបចំដោយសភាពាណិជ្ជកម្មស្វីស និងក្រសួងពាណិជ្ជកម្ម នៃព្រះរាជាណាចក្រកម្ពុជា។ វេទិកាដ៏មានសារៈសំខាន់នេះ មានការអញ្ជើញ ចូលរួមពីអ្នកវិនិយោគទុនធំរបស់ប្រទេសស្វីស សហភាពអឺរ៉ុប សហររដ្ឋអាមេរិក និងអ្នកវិនិយោគទុនមួយចំនួន នៃទ្វីបអាស៊ី សរុបប្រមាណ១០០នាក់។
លោកបណ្ឌិត Urs Lustenberger ប្រធានសភាពាណិជ្ជកម្មស្វីស អាស៊ី និងលោក Pierre Tami សហគ្រិនផ្នែកសង្គម ពីប្រទេសកម្ពុជា មានប្រសាសន៍សំដែងនូវស្វាគមន៍យ៉ាងកក់ក្តៅបំផុត ចំពោះវត្តមានដ៏ឧត្តុង្គឧត្តមរបស់សម្តេចតេជោ នាយករដ្ឋមន្រ្តី និងគណៈប្រតិភូជាន់ខ្ពស់រាជរដ្ឋាភិបាលកម្ពុជា ដែលបានធ្វើដំណើរយ៉ាងសកម្មក្នុងការអញ្ជើញចូលរួម វេទិកាសេដ្ឋកិច្ចពិភពលោកនៅទីក្រុងដាវ៉ូស ក្លូសស្ទើរ ចំនួនពីរលើក ដែលនោះបង្ហាញពីការយកចិត្តទុកដាក់ខ្ពស់ របស់សម្តេចតេជោនាយករដ្ឋមន្រ្តី ចំពោះការជំរុញកំណើនសេដ្ឋកិច្ចនិងការកាត់បន្ថយភាពក្រីក្ររបស់ប្រជាពលរដ្ឋ ទាំងអស់នៅលើពិភពលោក។ ជាមួយនិងការថ្លែងនោះដែរ លោកទាំងពីរក៏បានសំដែងនូវការវាយតម្លៃខ្ពស់ ជូនចំពោះ សម្តេចតេជោនាយករដ្ឋមន្រ្តី ដែលតែងតែមានវត្តមានអញ្ជើញចូលរួមក្នុងវិទិកាវិនិយោគ ដែលរៀបចំដោយសភាពាណិជ្ជកម្មស្វីស និងក្រសួងពាណិជ្ជកម្ម នៃព្រះរាជាណាចក្រកម្ពុជា ដើម្បីបង្ហាញពីការទាក់ទាញដល់អ្នកវិនិយោគបរទេសនានា ចំពោះការវិនិយោគនៅព្រះរាជាណាចក្រកម្ពុជា។
មានប្រសាន៍ទៅកាន់វេទិកាដ៏មានសារៈសំខាន់នោះ សម្តេចតេជោនាយករដ្ឋមន្រ្តីមានប្រសាសន៍ថា សេដ្ឋកិច្ចកម្ពុជានៅមានសក្តានុពលរីកលូតលាស់ខ្ពស់ និងមានកាលានុវត្តភាពក្នុងការធ្វើពិពិធកម្មក្នុងវិស័យជាច្រើន ដែលគូសបញ្ជាក់ពីវិសាលភាពទូលំទូលាយសម្រាប់ការវិនិយោគ។ សម្តេចតេជោនាយករដ្ឋមន្រ្តីមានប្រសាសន៍បន្តថា សម្រាប់វិនិយោគិន នេះគឺជាឱកាសមាស ដែលមិនអាចមើលរំលងបាន ហើយដើម្បីគោលដៅនៃការធ្វើពិពិធកម្មនេះ រាជរដ្ឋាភិបាលកម្ពុជាបានគ្រោង នឹងដាក់ចេញនូវគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ នៅក្នុងពេលឆាប់ៗ ខាងមុខ ដែលនឹងផ្តល់នូវយុទ្ធសាស្រ្តកំណើនថ្មី ជាចក្ខុវិស័យ និងផែនការចង្អុលទិសសម្រាប់ការអភិវឌ្ឍ វិស័យជាអាទិភាពនានា ហើយដែលក្នុងនោះការលើកកម្ពស់ការវិនិយោគផ្ទាល់ពីបរទេស គឺជាផ្នែកមួយដ៏សំខាន់នៃគោលនយោបាយជាអាទិភាពនោះ និងជាឧបករណ៍គន្លឹៈសម្រាប់សម្រេចបាន តាមគោលដៅនៃយុទ្ធសាស្រ្តកំណើនថ្មីរបស់កម្ពុជា។
សម្តេចតេជោនាយករដ្ឋមន្រ្តីមានប្រសាសន៍បន្ថែមថា នៅក្នុងបរិការណ៍ នៃការផ្លាស់ប្តូរនិម្មាបនកម្មតំបន់ ពិសេសនៅក្នុងការបង្កើតឡើងនូវសហគមន៍សេដ្ឋកិច្ចអាស៊ាន និងការរៀបចំភាពជាដៃគូសេដ្ឋកិច្ចតំបន់គ្រប់ជ្រុងជ្រោយ កម្ពុជាកំពុងប្រែក្លាយខ្លួនជាបេក្ខភាព ប្រកបដោយសក្តានុពល សម្រាប់ការអភិវឌ្ឍវិស័យឧស្សាហកម្ម ដែលផ្សារភ្ជាប់ទៅនិងអ្វីដែលគេហៅថា រោងចក្រពិភពលោក នៅតំបន់អាស៊ី តាមរយៈកាខិតខំជំរុញការតភ្ជាប់ ទាំងខាងរូបវ័ន្ត ឌីជីថល និងស្ថាប័ន ព្រមទាំងការបង្កើតទីផ្សារតំបន់មួយ ទូលំទូលាយ ប្រកបដោយចេរភាព។ សម្តេចតេជោនាយករដ្ឋមន្រ្តីមានប្រសាសន៍បន្តថា តាមរយៈការប្តេជ្ញាចិត្តរបស់រាជរដ្ឋាភិបាល វិនិយោគិនអាចទទួលបាននូវអត្ថប្រយោជន៍ច្រើន ពីការចូលរួមវិនិយោគលើវិស័យឧស្សាហកម្ម និងវិស័យសេដ្ឋកិច្ចដែលជាសក្តានុពលសំខាន់ៗរបស់កម្ពុជា ដែលជាប្រទេសបើកចំហមានកម្លាំងពលកម្មវ័យក្មេង ហើយមានការស្រេកឃ្លានចំណេះដឹងខ្ពស់ មានហេដ្ឋារចនាសម្ព័ន្ធកាន់តែប្រសើរឡើង មានកំណើននៃស្រទាប់ប្រជាជនថ្នាក់កណ្តាល មានកំណើននៃកម្លាំងទិញ ដោយសារចង្វាក់ដ៏លឿននៃចំណូល មានភាពអំណោយផលពីកត្តាភូមិសាស្រ្តនយោបាយ និងមានកិច្ចសហប្រតិបត្តិការល្អជាមួយសហគមន៍អន្តរជាតិ។
នៅក្នុងសុន្ទរកថាគន្លឹះនោះដែរ សម្តេចតេជោនាយករដ្ឋមន្រ្តី មានប្រសាសន៍សង្កត់ធ្ងន់ថា ក្នុងរយៈពេលប៉ុន្មានឆ្នាំចុងក្រោយនេះ កម្ពុជាត្រូវបានគេទទួលស្គាល់ថា បានឆ្លងកាត់ការផ្លាស់ប្តូរយ៉ាងច្រើន ពោលគឺមិនត្រឹមតែនៅក្នុងផ្នែកនយោបាយ និងសន្តិសុខប៉ុណ្ណោះទេ ប៉ុន្តែថែមទាំងមានការផ្លាស់ប្តូរខាងផ្នែកសេដ្ឋកិច្ច ពាណិជ្ជកម្មនិងសង្គម ជាក់ស្តែងក្នុងរយៈពេលជាងពីរទសវត្សរ៍ចុងក្រោយនេះ សេដ្ឋកិច្ចកម្ពុជាបានកើនឡើងជាមធ្យមប្រមាណ៧,៧% ក្នុងមួយឆ្នាំ ទោះបីជាត្រូវប្រឈមនឹងភាពមិនប្រាកដប្រជា និងហានិភ័យជាច្រើនទាំងក្នុងនិងក្រៅប្រទេសក៏ពិតមែន។
សម្តេចតេជោនាយករដ្ឋមន្រ្តីក៏បានធ្វើការគូសបញ្ជាក់ទៅកាន់វាគ្មិនចូលរួមទាំងអស់នោះដែរថា ការវិនិយោគផ្ទាល់ពីបរទេស បន្តមានសកម្មភាពយ៉ាងខ្លាំងដោយសារកត្តាអំណោយផលនៅក្នុងប្រទេស និងក្នុងតំបន់ ជាពិសេសការផ្លាស់ទីតាំងរោងចក្រផលិតកម្មពីប្រទេសជិតខាងក្នុងតំបន់ និងកំណើនវិនិយោគផ្ទាល់ពីបរទេស ពីប្រទេសដៃគូសំខាន់ដូចជាប្រទេសចិន ជប៉ុន សាធារណរដ្ឋកូរ៉េ។
សម្តេចតេជោបន្តថា កំណើននៃការវិនិយោគ ក្នុងឆ្នាំ២០១៤ បានបង្ហាញឲ្យឃើញពីចំណាប់អារម្មណ៍កាន់តែច្រើនលើសក្តានុពល និងកាលានុវត្តភាពវិនិយោគនៅកម្ពុជា ជាពិសេសការជឿជាក់លើសមត្ថភាពរបស់រាជរដ្ឋាភិបាល ក្នុងការដឹកនាំ និងគ្រប់គ្រងប្រទេស។
ថ្លែងទៅកាន់អ្នកវិនិយោគទុនទាំងអស់ ដែលមានវត្តមានអញ្ជើញចូលរួមក្នុងវេទិកាដ៏មានសារៈសំខាន់នេះដែរ ឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងពាណិជ្ជកម្ម ឯកឧត្តមទេសរដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងឯកឧត្តម ប៉ាន់ សូរស័ក្តិ រដ្ឋមន្រ្តីក្រសួងពាណិជ្ជកម្ម បានឡើងថ្លែងទាក់ទិនទៅនឹងសំណួរដែលលើកឡើងពីសំណាក់អ្នកវិនិយោគទុននានា ដោយបានធ្វើការគូសបញ្ជាក់រួមគ្នាថា លំហូរចូលនៃវិនិយោគផ្ទាល់ពីបរទេស ផ្តោតជាចម្បងលើវិស័យឧស្សាហកម្មកាត់ដេរ កសិកម្ម រោងម៉ាស៊ីនកិនស្រូវ វិស័យសំណង់ និងវិស័យទេសចរណ៍ ដែលប្រការទាំងអស់នោះ បានចង្អុលបង្ហាញអំពីទស្សនវិស័យអនាគតដ៏ល្អ នៃឧស្សាហកម្មថ្មីៗនៅកម្ពុជា ពិសេសគឺលទ្ធភាពនៃការពង្រីកបន្ថែមទៅលើផ្នែកគ្រឿងយន្ត អេឡិចត្រូនិក និងការកែច្នៃផលិតផលកសិកម្ម ក៏ដូចជាការធ្វើពិពិធកម្មលើវិស័យផលិតកម្ម វាយនភណ្ឌ និងវិស័យទេសចរណ៍ឲ្យមានតម្លៃបន្ថែមនិងខ្ពស់ជាងមុន។
ឯកឧត្តមទេសរដ្ឋមន្រ្តីមានប្រសាសន៍បន្តថា ក្នុងគោលដៅបង្កើនសមត្ថភាពប្រកួតប្រជែងនៃសេដ្ឋកិច្ច យើងនឹងបន្តផ្តោតការយកចិត្តទុកដាក់ ជាពិសេសលើការបង្កើនការវិនិយោគសាធារណៈ ក្នុងការអភិវឌ្ឍន៍ប្រព័ន្ធហេដ្ឋារចនាសម្ព័ន្ធ រួមមានទាំងតាមរយៈយន្តការនៃការចូលរួមរបស់វិស័យឯកជន ការអភិវឌ្ឍវិស័យធនធានមនុស្ស និងការបណ្តុះបណ្តាលកម្លាំងពលកម្មឲ្យមានសមត្ថភាព និងជំនាញស្របតាមតម្រូវការទីផ្សារ។ ឯកឧត្តមមានប្រសាសន៍បន្តថា អាទិភាពពិសេសនឹងត្រូវបានផ្តោតទៅលើការរៀបចំ និងដាក់ឲ្យអនុវត្តនូវផែនការមេនៃការអភិវឌ្ឍហេដ្ឋារចនាសម្ព័ន្ធ គមនាគមន៍ដឹកជញ្ជូន ដើម្បីតភ្ជាប់ផ្ទៃក្នុងប្រទេសផង និងតភ្ជាប់ជាមួយនិងប្រទេសជិតខាងផង តាមរយៈការអភិវឌ្ឍប្រព័ន្ធដឹកជញ្ជូនគ្រប់ប្រភេទ ឲ្យក្លាយជាប្រព័ន្ធឡូជីស្ទីកមួយដ៏រស់រវើក និងមានភាពប្រកួតប្រជែង នៅក្នុងគោលដៅលើកកម្ពស់ការវិនិយោគ ពាណិជ្ជកម្ម ទេសចរណ៍ និងការអភិវឌ្ឍជនបទ។
នៅក្នុងវេទិការនេះដែរ ឥស្សរជនជាន់ខ្ពស់តាមគ្រប់ជំនាញទាំងអស់របស់ប្រទេសកម្ពុជា បានធ្វើការឆ្លើយនូវសំណួរមួយចំនួនដែលទាក់ទិនទៅនឹងចម្ងល់មួយចំនួនរបស់អ្នកវិនិយោគិនស្វីស អាមេរិក សហភាពអឺរ៉ុបនិងអាស៊ី ដែលទាក់ទិនទៅនិងការវិនិយោគក្នុងប្រទេសកម្ពុជា ពិសេសទាក់ទិនទៅនិងប្រព័ន្ធច្បាប់ ដោយបានធ្វើការគូសបញ្ជាក់ថា កម្ពុជានឹងរៀបចំធ្វើវិសោធនកម្មទៅលើច្បាប់សំខាន់ៗមួយចំនួន ដូចជាច្បាប់ស្តីពីការវិនិយោគ ច្បាប់ស្តីពីសារពើពន្ធ ដើម្បីបង្កើនភាពទាក់ទាញសម្រាប់ការវិនិយោគ និងធានាភាពស៊ីសង្វាក់គ្នានៅក្នុងក្របខណ្ឌច្បាប់ និងលិខិតបទដ្ឋាន។ ជាមួយគ្នានេះកម្ពុជានឹងដាក់ឲ្យអនុវត្តនូវក្របខណ្ឌនៃការអភិវឌ្ឍសហគ្រាសធុនតូចនិងមធ្យម ដែលមានសង្គតិភាពជាមួយនឹងគោលនយោបាយអភិវឌ្ឍន៍វិស័យឧស្សាហកម្ម។ ជាមួយគ្នានេះរាជរដ្ឋាភិបាល បាននិងកំពុងធ្វើការកែទម្រង់ស្ថាប័ន និងការពង្រឹងអភិបាលកិច្ចសំដៅធ្វើយ៉ាងណាបង្កើនសមត្ថភាព ប្រសិទ្ធភាព សុចរិតភាព និងភាពឆ្លើយតប របស់ស្ថាប័នរដ្ឋដែលជាប្រការចាំបាច់បំផុត សម្រាប់ជួយទ្រទ្រង់ដល់របៀបវារៈនៃការកែទម្រងដ៏ទូលំទូលាយរបស់កម្ពុជា ពិសេសការលើកកម្ពស់ប្រសិទ្ធភាពនៃការផ្តល់សេវាសាធារណៈ និងការពង្រឹងបន្ថែមទៀត នូវបរិយាកាសវិនិយោគនៅកម្ពុជា។
មេដឹកនាំទាំងអស់បានចាត់ទុកថា រាជរដ្ឋាភិបាលបានចំណាយពេលជាច្រើនមកហើយ ក្នុងការខិតខំប្រឹងប្រែងរៀបចំសេដ្ឋកិច្ចរបស់ប្រទេសកម្ពុជា ឲ្យកាន់តែប្រសើរឡើងនោះ។ នៅចំពោះមុខអ្នកវិនិយោគទុន មេដឹកនាំទាំងអស់ក៏បានចាត់ទុកដែរថា នៅលើពិភពលោកយើងនេះមិនមានប្រទេសណាមួយដែលបានអនុញ្ញាតឲ្យក្រុមហ៊ុនបរទេសបណ្តាក់ទុនវិនិយោគ១០០% ដោយមិនទាមទារឲ្យមានភាគហ៊ុនក្នុងស្រុក ដូចជាប្រទេសកម្ពុជានោះទេ ទាំងនេះបង្ហាញថាកម្ពុជាកំពុងតែផ្តល់នូវអាទិភាពខ្ពស់ខ្លាំងណាស់ ដល់អ្នកវិនិយោគទុនបរទេសមកបណ្តាក់ទុន កាន់តែច្រើនឡើងក្នុងប្រទេសកម្ពុជា។ ជាមួយនិងការផ្តល់នូវភាពអនុគ្រោះជាពិសេសនោះ រាជរដ្ឋាភិបាលក៏បានផ្តល់ឲ្យក្រុមហ៊ុនបរទេស អាចប្រើប្រាស់នូវរូបិយប័ណ្ណបរទេស ក្នុងការបើកប្រាក់បៀវត្សដ៏បុគ្គលិកកម្មករ ដោយសេរីនិងមិនមានការបង្វិតបង្ខំអ្វីទាំងអស់៕
www.pressocm.gov.kh
