នៅរសៀលថ្ងៃពុធ ៨កើត ខែជេស្ឋ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី១៩ ខែឧសភា ឆ្នាំ២០២១ ឯកឧត្តម ប៉ិច សុខា សមាជិកនិងជាអគ្គលេខាធិការស្តីទីនៃក្រុមប្រឹក្សាសេដ្ឋកិច្ច សង្គមកិច្ចនិងវប្បធម៌ (អតីតសិក្ខាកាមនៃវគ្គបណ្តុះបណ្តាលមន្រ្តីវ័យក្មេងនៅវិទ្យាស្ថានផ្លាស់ប្តូរយុវជនអន្តរជាតិចិនក្វាងស៊ី)
បានចូលរួមកិច្ចប្រជុំតាមវីដេអូអនឡាញ(កម្មវិធី/ប្រព័ន្ធ Zoom) ស្តីពីការចែករំលែកបទពិសោធន៍ “ស្តីពីការកាត់បន្ថយភាពក្រីក្ររវាងយុវជនចិននិងកម្ពុជា”
ដែលសហការរៀបចំឡើងដោយសហព័ន្ធយុវជនទូទាំងប្រទេសចិន សហព័ន្ធយុវជនទូទាំងតំបន់ក្វាងស៊ី
និងសមាគមអតីតសិក្ខាកាមនៃវគ្គបណ្តុះបណ្តាលមន្រ្តីវ័យក្មេងកម្ពុជានៅវិទ្យាស្ថានផ្លាស់ប្តូរយុវជនអន្តរជាតិចិនក្វាងស៊ី
កិច្ចប្រជុំនេះភាគីកម្ពុជាដឹកនាំដោយឯកឧត្តម ហួត ហាក់ រដ្ឋលេខាធិការក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច និងជាប្រធានសមាគមអតីតសិក្ខាកាមនៃវគ្គបណ្តុះបណ្តាលមន្រ្តីវ័យក្មេងកម្ពុជានៅវិទ្យាស្ថានផ្លាស់ប្តូរយុវជនអន្តរជាតិចិនក្វាងស៊ី)។
នៅក្នុងកិច្ចពិភាក្សានៃអង្គប្រជុំនោះ ឯកឧត្តម ប៉ិច សុខា បានមានចំណាប់អារម្មណ៍ខ្លីចំនួន៣ចំណុចសំខាន់ៗដែលទាក់ទងទៅនឹងប្រធានបទនៃ ”ការកាត់បន្ថយភាពក្រីក្ររវាងយុវជនចិនកម្ពុជា” ដូចតទៅ៖
ទី១- ការចាក់វ៉ាក់សាំងការពារជំងឺកូវីដ១៩ គឺជាការងារយុទ្ធសាស្រ្តចំបងបំផុតដើម្បីឈានទៅកាត់បន្ថយភាពក្រីក្ររបស់កម្ពុជានាពេលបច្ចុប្បន្ននេះ។ ដូច្នេះឆ្លៀតក្នុងឱកាសនេះខ្ញុំសូមអរគុណដល់រដ្ឋាភិបាលចិននិងប្រជាជនចិន ដែលបានផ្តល់វ៉ាក់សាំងមួយចំនួនក្រោមរូបភាពជាជំនួយ និងបានផ្គត់ផ្គង់វ៉ាក់សាំងមកកម្ពុជាជាបន្តបន្ទាប់កន្លងមក និងស្នើសុំរដ្ឋាភិបាលចិនផ្តល់អាធិភាពជួយប្រទេសកម្ពុជាដែលជាមិត្តភាពដែកថែបបន្ថែមទៀត ដើម្បីជួយកម្ពុជាអាចបើកសេដ្ឋកិច្ចឡើងវិញបានឆាប់រហ័ស។
ទី២- នៅពេលកម្ពុជាបើកសេដ្ឋកិច្ចឡើងវិញនាពេលខាងមុខ ស្នើសុំសហព័ន្ធយុវជនទូទាំងប្រទេសចិន ក៏ដូចជាសហព័ន្ធយុវជនទូទាំងតំបន់ក្វាងស៊ី ជួយណែនាំ ព្រមទាំងជួយជម្រុញអ្នកវិនិយោគចិន មកកម្ពុជាឱ្យបានច្រើន។ ហើយម្យ៉ាងវិញទៀតសូមជួយផ្សព្វផ្សាយដល់ប្រជាជនចិនឱ្យមកទេសចរណ៍កំសាន្តនៅកម្ពុជា ដើម្បីជួយកម្ពុជាឱ្យមានលទ្ធភាពធំក្នុងការស្តារសេដ្ឋកិច្ចឡើងវិញក្រោយពេលយើងអាចគ្រប់គ្រងកូវីដ១៩បានដោយជោគជ័យ។
ទី៣- រាជរដ្ឋាភិបាលកម្ពុជានីតិកាលទី៦នៃរដ្ឋសភា បានផ្តល់អាទិភាពទី១ក្នុងយុទ្ធសាស្រ្តចតុកោណដំណាក់កាលទី៤ គឺ “ការអភិវឌ្ឍធនធានមនុស្ស” ដូច្នេះឆ្លៀតក្នុងឱកាសនេះស្នើសុំភាគីមិត្តចិនជួយផ្តល់អាហាររូបករណ៍មកកម្ពុជា ឱ្យបានច្រើន ដើម្បីជួយកម្ពុជាសម្រេចបានចក្ខុវិស័យឆ្នាំ២០៣០ក្លាយជាប្រទេសចំណូលមធ្យមកម្រឹតខ្ពស់ និងប្រទេសចំណូលខ្ពស់នៅឆ្នាំ២០៥០។
ECOSOCC
