នាល្ងាចថ្ងៃអង្គារ ៤កើត ខែទុតិយាសាឍ ឆ្នាំឆ្លូវ ត្រីស័ក ពស ២៥៦៥ ត្រូវនឹងថ្ងៃទី១៣ ខែកក្កដា ឆ្នាំ២០២១ ឯកឧត្ដម ប៉ិច សុខា អគ្គលេខាធិការស្ដីទីនៃក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ (ក.ស.វ.) បានចូលរួមសិក្ខាសាលាស្ដីពីការបង្កើនវិទ្យាសាស្ត្របច្ចេកវិទ្យានិងការឆ្នៃប្រឌិតដើម្បីបង្កើតប្រព័ន្ធស្បៀងអាហារដែលធន់បន្ថែមទៀតករណីបច្ចេកវិទ្យាការដាំស្មៅនិងផលិតផ្សិត(Juncao Technology) តាមរយៈប្រព័ន្ធអនឡាញកម្មវិធី (Zoom Meeting)។ សិក្ខាសាលានេះសហការរៀបចំដោយនាយកដ្ឋានកិច្ចការសង្គមនិងសេដ្ឋកិច្ចរបស់អង្គការសហប្រជាជាតិ (United Nation Department of Economic and Social Affairs) និងមហាវិទ្យាល័យកសិកម្មនិងរិក្ខាប្រមាញ់ខេត្តហ្វូចៀនប្រទេសចិន។
Juncao ជាឈ្មោះបច្ចេកវិទ្យាចិនដែលបានធ្វើការអភិវឌ្ឍន៍តាំងពីឆ្នាំ១៩៨០ នៅខេត្តហ្វូចៀន ប្រទេសចិន។ Jun តាមភាសាចិនមានន័យថា Fungus ឬ ផ្សិត ឯ Cao តាមភាសាចិនមានន័យថា Grass ឬ ស្មៅ ដូច្នេះ Juncao មានន័យថា ផ្សិត និង ស្មៅ។
នៅឆ្នាំ១៩៨៣ អ្នកវិទ្យាសាស្ត្រ និងបច្ចរវិទ្យា នៅខេត្តហ្វូចៀនបានធ្វើពិសោធដោយដាក់ដាំស្មៅចំនួនសែសិបប្រាំមួយ(៤៦)ប្រភេទនៅតាមវាលរហោស្ថាននិងដីព្រៃរិចរិលដើម្បីទប់ស្កាត់ការហូរច្រោះដី។
ស្មៅដែលដាំបានចាប់ចាក់ឬសយ៉ាងលឿនទៅក្នុងដីហិល ដីព្រៃរិចរិល ទាំងនោះដែលអាចការពារការហូរច្រោះយ៉ាងមានប្រសិទ្ធភាព។ ស្មៅត្រូវបានយកទៅធ្វើចំណីសត្វគោ ក្របី ពពែ ចៀម យ៉ាងមានគុណភាពដែលធ្វើឲ្យសត្វធំធាត់យ៉ាងលឿន។ ផ្សិតជាច្រើនប្រភេទក៏ត្រូវបានអភិវឌ្ឍទៅជាឧស្សាហកម្មម្ហូបអាហារ និងឧសថ ដែលជួយកសិករក្រីក្រឲ្យទទួលបានចំណូលខ្ពស់ពីការផលិត និងកែឆ្នៃផ្សិតនេះ។
Juncao Technology មានសារប្រយោជន៍សម្រាប់ជួយកសិករក្រីក្រដែលរស់នៅក្នុងតំបន់បាត់បង់ព្រៃឈើ តំបន់ដីគ្មានជីរជាតិ ឲ្យអាចស្តាគុណភាពដីឡើងវិញ អាចអភិវឌ្ឍរបរចិញ្ចឹមសត្វ និងអាចផលិតផ្សិត កែឆ្នៃផ្សិត ដើម្បីបង្កើនចំណូល ដែលធ្វើឲ្យជីវភាពរស់នៅរបស់ពួកគេទាំងនោះបានកាន់តែប្រសើរឡើង។
ECOSOCC
